Böyükqışlaq yolunda nəzarətsiz tikinti işğalı – turist axınını boğan, Tovuzun nəfəsini kəsən sosial-iqtisadi problem hər gün öz məcrasını genişləndirir.

Tovuzun Böyükqışlaq yolunda davam edən və heç bir normativ çərçivəyə sığmayan tikinti fəaliyyəti artıq sadəcə urbanistik nizam-intizamın pozulması deyil, bölgənin infrastrukturunu çökdürən, insanların gündəlik həyatını iflic edən və Tovuzun gələcək inkişaf perspektivlərini kökündən zədələyən sistemli bir xaosa çevrilir. Tikinti adı ilə həyata keçirilən qanunsuz fəaliyyət, özündən başqa heç bir ictimai marağı tanımayan acgözlüyün təzahürü kimi, yolun kənarlarını yavaş-yavaş udaraq turistlərin və Tovuz camaatının, həm də yuxarı kəndlərdən gələn nəqliyyatın normal hərəkətini açıq şəkildə bloklayır.

İstirahət bölgəsinə gedən yeganə tranzit xətti olan bu yolun hər gün bir az daha daralması, nəqliyyat dalğalarını tıxac bataqlığına sürükləyərək hərəkəti keçilməz hala gətirməsi artıq sakinləri dözüm həddindən çıxarır, turistlərin isə bölgəyə olan marağına ciddi zərbə vurur. Daha da acınacaqlısı odur ki, piyadaların təhlükəsizliyi üçün salınmış səkilər belə zəbt edilərək faktiki olaraq məhv edilir, sakinlərin həyatı riskə atılır.

Kəndlilərin “priyezd” kimi tanıdığı, Tovuzun sosial və iqtisadi inkişafının şah damarı sayılan yol bu gün tikinti basqısı altında boğulur, funksiyasını itirib, yararsız bir keçidə çevrilir. Yolun bu qədər daralması və hər gün yeni tikinti maneələri ilə qarşılaşması nəinki əhalinin həyat ritmini pozur, həm də bölgənin turizm potensialını sanki bilərəkdən sıradan çıxarır. Nəqliyyatın iflic olması, insanların yollarda sıxılıb qalması, ərazidə yaranan xaosun artıq adi “narahatlıq” çərçivəsini çoxdan aşdığını göstərir.

Bu vəziyyəti daha da dözülməz edən məqam, aidiyyəti qurumların bu prosesləri göz görə-görə susqunluqla izləməsi, tikintilərin təsadüfi şəkildə genişlənməsinə, yolun taleyinin qaranlığa qərq olmasına imkan verməsidir. Sanki bölgənin inkişaf strategiyası deyil, tikinti sahiblərinin şəxsi ambisiyaları yolun taleyini müəyyən edir. Halbuki məhz bu laqeydlik nəticəsində Böyükqışlaq yolunda baş verən nizam-intizamsızlıq yalnız bu günün deyil, sabahın da sosial-iqtisadi problemlərinin toxumunu səpir.

Böyükqışlaq yolunda yaranmış bu acınacaqlı durum təkcə sosial-iqtisadi problem kimi qəbul edilə bilməz; bu, nəzarətin çatışmazlığının, planlaşdırmanın olmamasının, həm də ictimai maraqların düşünülmədən tapdanmasının kəskin nəticəsidir. Yolların bu şəkildə iflic vəziyyətinə salınması Tovuzun iqtisadi dinamizmini öldürməklə yanaşı, həm də bölgəyə gələn turistlərin təhlükəsizlik təminatını zədələyir, sakinlərin narazılığı daha da dərinləşdirir.

Əgər tikinti genişlənməsinə qarşı qəti və prinsipial tədbirlər görülməzsə, Böyükqışlaq yolunda bu gün yaşanan xaos sabah nəinki Tovuzun , ümumilikdə bütün bölgənin sosial tarazlığını pozacaq və insanların həyat keyfiyyətini daha da aşağı salacaq. Bu yolun yenidən nəfəs alması üçün təkcə bərpa deyil, ciddi nəzarət, planlaşdırma və ictimai marağın üstün tutulması tələb olunur.