"Telegram" mesencerinin qurucusu Pavel Durov Avropa ölkələrinin hakimiyyətlərini insanların azadlıqlarını məhdudlaşdırmağa çalışmaqda ittiham edib.

"Azerinews.az" ın məlumatına görə, o öz "Telegram" kanalında avropalıların hüquqlarının təhlükə altında olduğunu bildirib.

Durov qeyd edib ki, mesencer Fransadakı bütün istifadəçilərinə Avropa İttifaqının (Aİ) çatlar üzərində nəzarət haqqında qanun layihəsi barədə mesaj göndərib. Sahibkar vurğulayıb ki, insanlar onların azadlıqlarını oğurlamağa çalışanların adlarını bilməlidirlər.

"Bu gün Aİ az qala sizi şəxsi həyatınızın toxunulmazlığı hüququndan məhrum edəcək. O, hər şəxsi mesajı skan etməyi tələb edən və bütün istifadəçilərin telefonlarını casusluq alətinə çevirən qanun haqqında səsvermə keçirməyə hazırlaşırdı. Fransa bu avtoritar qanun uğrunda hərəkatın başında dururdu", - Durov yazıb.

Qanun layihəsini dəstəkləyənlər arasında Fransanın keçmiş daxili işlər naziri Brüno Retayo və nazirliyin hazırkı rəhbəri Loran Nunyes də var.

Qeyd olunur ki, təşəbbüs cinayətkarları dayandırmayacaq, çünki onlar hüquq-mühafizə orqanlarından gizlənmək üçün VPN xidmətlərindən və ya xüsusi saytlardan istifadə edə bilərlər.

Qanun layihəsi qəbul edilməyib, çünki Almaniya ona qarşı çıxıb. "Almaniyanın mövqeyi hüquqlarımızı xilas etdi. Lakin azadlıq hələ də təhlükə altındadır. Fransız siyasətçiləri şəxsi mesajlara tam giriş əldə etməyə çalışarkən, fransızların və bütün avropalıların əsas hüquqları təhlükə altında qalır", - yazıda qeyd olunub.