Türkmənistan Prezidenti Sərdar Berdiməhəmmədov İqtisadi Əməkdaşlıq Təşkilatının (ECO) Baş katibi Xosrov Noziri ilə müxtəlif sahələrdə əməkdaşlıq məsələlərini müzakirə edib.

 "Azerinews.az" xəbər verir ki, bu barədə Mərkəzi Asiya ölkəsinin rusdilli rəsmi qəzeti olan “Neytralnı Turkmenistan” məlumat yayıb.

Əməkdaşlığın prioritet istiqamətləri sırasında enerji sektoru qeyd edilib. Berdiməhəmmədovun sözlərinə görə, böyük təbii qaz ehtiyatlarına malik Türkmənistan öz tədarükünü, o cümlədən istehlakçılara və ECO məkanındakı tranzit ölkələrə əhəmiyyətli dərəcədə diversifikasiya etməyə hazırdır. Eyni zamanda, Türkmənistan rəhbəri ECO-nu Şimal-Cənub və Şərq-Qərb kimi nəqliyyat dəhlizlərindən istifadə edərək ölkənin tranzit imkanlarının həyata keçirilməsində daha fəal rol almağa dəvət edib.

Tərəflər həmçinin qeyd ediblər ki, ECO-ya üzv dövlətlərin qarşılıqlı faydalı tərəfdaşlıq əlaqələrinin qurulması üçün böyük imkanları var. Bu, ilk növbədə ticarət-iqtisadi sahədə, eləcə də mədəni-humanitar sahədə, ekologiya və turizm sahəsində qarşılıqlı fəaliyyətə aiddir. Vurğulanıb ki, Türkmənistan birgə layihə və proqramların həyata keçirilməsi yolu ilə ECO formatında səmərəli əməkdaşlığı təşviq etmək niyyətindədir.

Qeyd edək ki, İqtisadi Əməkdaşlıq Təşkilatı Azərbaycan, Əfqanıstan, İran, Qazaxıstan, Qırğızıstan, Pakistan, Tacikistan, Türkmənistan, Türkiyə və Özbəkistanın daxil olduğu regional dövlətlərarası iqtisadi strukturdur. Təşkilat 1985-ci ildə İran, Pakistan və Türkiyə tərəfindən yaradılıb, onun daimi katibliyinin qərargahı Tehranda yerləşir.