London Avropa İnsan Hüquqları Məhkəməsinin (AİHM) yurisdiksiyasını tərk edə bilər.

Bu barədə Böyük Britaniyanın Baş naziri Rişi Sunak “The Sun” qəzetinə müsahibəsində bildirib.

O bu addıma səbəb kimi qeyri-qanuni miqrasiya ilə mübarizəni göstərib.

“Hesab edirəm ki, sərhəd təhlükəsizliyi və qeyri-qanuni immiqrasiya ilə mübarizə bizim hər hansı bir xarici məhkəməyə üzvlükdən daha vacibdir”, - deyə hökumət başçısı əlavə edib.

Britaniyanın baş naziri məsələni sona çatdıracağına söz verib və əlavə edib ki, onun fikrincə, Londonun qeyri-qanuni miqrasiya ilə mübarizə sxemi bütün beynəlxalq öhdəliklərə, o cümlədən AİHM qarşısındakı öhdəliklərə uyğundur.

Sunak qeyri-qanuni miqrasiya ilə mübarizə məsələsini Britaniyanın suverenliyi üçün fundamental hesab edib və bunu seçki kampaniyası vədi edəcəyini bildirib. Bu il Böyük Britaniyada parlament seçkisi keçirilməlidir.

Sunak əlavə edib ki, o, özü mühacir ailəsindəndir.

“Düşünürəm ki, bu, həmişə qonaqpərvər, mərhəmətli bir ölkə olacaq, lakin bunu ədalətli, qanuni şəkildə etmək lazımdır. Biz öz növbəmizi gözləyən, ədalətli payımızı ödəyən, qaydalarla oynayan insanlarıq və bu, bütün bu anlayışlara ziddir. Buna sadiq qalmağımız çox vacibdir”, - deyə o vurğulayıb.

Nəşrin məlumatına görə, Sunakın bu bəyanı, iki il əvvəl Böyük Britaniyadan Ruandaya qeyri-qanuni miqrantların ekstradisiyasına cəhdin qarşısını alan Strasburq hakimlərinə indiyədək edilən ən ciddi xəbərdarlıqdır.

2022-ci ilin aprelində Böyük Britaniya Ruanda ilə qeyri-qanuni miqrantların ora göndərilməsi ilə bağlı razılığa gəlib, lakin həmin ilin iyununda AİHM-in qərarı ilə ilk belə reys ləğv edilib.