Gürcüstanın paytaxtı Tbilisi yaxınlığında, Vazianidə tikintisi planlaşdırılan yeni hava limanı istifadəyə verildikdən sonra Şota Rustaveli adına Tbilisi Beynəlxalq Hava Limanı mülki uçuşlar üçün bağlanacaq.

“Azerinews.az” “Sputnik Georgiya”ya istinadən xəbər verir ki, bu haqda Gürcüstan Hava Limanları Assosiasiyası məlumat yayıb.

 “2029-cu ilə qədər biz artıq yeni hava limanına sahib olacağıq və mövcud hava limanını tamamilə yenisinə köçürəcəyik”, - Gürcüstan Hava Limanları Assosiasiyasının baş direktoru İrakli Karkaşadze bildirib.

Məlumata görə, yeni hava limanı əvvəllər fəaliyyət göstərən hərbi aerodromun ərazisində yerləşəcək.

Mövcud Tbilisi hava limanı yenisi tikildikdən sonra logistik mərkəzə çevrilə, yaxud da yalnız yük təyyarələrini qəbul edə, eləcə də ölkənin yüksəkvəzifəli şəxsləri və yüksəkrütbəli xarici qonaqlara xidmət göstərə bilər. Bu məsələ ilə bağlı yekun qərar hələ verilməyib.