Səudiyyə Ərəbistanının “Əl-Nəsr” klubunun və Portuqaliya millisinin hücumçusu Kriştiano Ronaldo futbolçu karyerası ilə bağlı açıqlama verib.

“Azerinews.az” xəbər verir ki, 40 yaşlı hücumçu “Portugal Football Globe” mükafatlandırma mərasimində çıxışı zamanı yalnız milli komandada oynamaq istədiyini bildirib.

"Artıq 22 ildir ki, yığmadayam. Bu, mənim bu forma, qələbələr və ümumilikdə milli komandanın oyunlarına olan sevgimdən xəbər verir. Əgər bu mümkün olsaydı, yalnız millidə oynayardım, heç bir klubda yox. Milli komanda futbolçunun karyerasının zirvəsidir”, – deyə Ronaldo vurğulayıb.

Qeyd edək ki, mərasimdə o, milli komandadakı nailiyyətlərinə və uzun illər ərzində göstərdiyi xidmətlərə görə “Globo Prestigio” mükafatına layiq görülüb.

Xatırladaq ki, Ronaldo Portuqaliya millisinin heyətində Avropa çempionu və Millətlər Liqasının ikiqat qalibi olub. Ulduz futbolçu millidə keçirdiyi 223 oyunda 141 qol və 45 məhsuldar ötürmə ilə yadda qalıb.