Türkiyənin Kocaeli vilayətində silahlı hücuma məruz qalan "Sultanbeyli Belediyespor" klubunun futbolçusu Uğurcan Bekçi həyatını itirib.

Bu barədə "Azerinews.az" "Haber Global"a istinadən xəbər verir.

Məlumata görə, dekabrın 17-də baş verən hadisə zamanı yaralanaraq xəstəxanaya yerləşdirilən futbolçu üç gün sonra ölüb.

Qeyd edək ki, dekabrın 17-də Ömer Türkçakal Bulvarında hələlik məlum olmayan səbəbdən iki qrup arasında mübahisə yaranıb. Daha sonra mübahisə silahlı davaya çevrilib, 27 yaşlı futbolçu Uğurcan Bekçi, həmçinin 27 yaş və 31 yaşlarında daha iki şəxs silahla vurulublar. Onların hər üçü yaralanıb. Atışmada Uğurcan Bekçinin ayağından yara aldığı və vəziyyətinin ağır olduğu, əməliyyata ehtiyacı olduğu bildirilib.

Yaralılar yaxınlıqdakı xəstəxanalara yerləşdiriliblər. Daha əvvəl "Kağıtspor", "Körfez Spor Kulübü", "Belediye Derincespor", "24 Erzincanspor", "Ankara Keçiörengücü" kimi komandalarda oynamış, ən son III Liqada "Sultanbəyli Belediyespor"da forma geyən 27 yaşlı cinah oyunçusu Uğurcan Bekçinin vəziyyəti ağırlaşıb. Lakin bütün cəhdlərə baxmayaraq, onun həyatını xilas etmək mümkün olmayıb.

Hadisə ilə bağlı iki nəfər həbs olunub.