Fransız mütəxəssislər uşaqların 13 yaşına qədər smartfondan istifadə etməməsini tövsiyə edir.

"Azerinews.az" xarici KİV-ə istinadla xəbər verir ki, səbəb kimi isə smartfonların uşaqların inkişafına mənfi təsir göstərməsi qeyd olunub.

Fransa Prezidenti Emmanuel Makronun təyin etdiyi ekspert komitəsinin hazırladığı hesabata görə, 3 yaşından kiçik uşaqlar ekran qarşısında heç vaxt keçirməməli, 6 yaşına qədər isə bu müddət güclü şəkildə məhdudlaşdırılmalıdır.

Həmçinin bildirilib ki, 11 yaşından kiçik uşaqlara mobil telefon verilməməli və 13 yaşından kiçik heç kəsin internetə çıxışı olan telefonu olmamalıdır.

Qeyd olunub ki, 18 yaşından kiçiklər üçün sosial mediadan istifadə qadağan edilməlidir. Bildirilib ki, bu yaşdan aşağı olanların yalnız "Bluesky" kimi etik platformalara daxil olmasına icazə verilə bilər.

Ümumdünya Səhiyyə Təşkilatı da bildirir ki, 2 yaşa qədər ekranda qalma vaxtı tövsiyə edilmir və 2 yaşdan yuxarı uşaqlar üçün bir saatdan çox olmamalıdır.
Araşdırma nəticəsində ekran qarşısında vaxt keçirməyin uşaqların sağlamlığı, inkişafı və cəmiyyətin gələcəyi üçün fəsadları olduğu aşkarlanıb.