İlk Sovet İttifaqı Qəhrəmanı İsrafil Məmmədovun xatirəsi Gəncədə anılıb. Bu münasibətlə düzənlənən tədbir qəhrəmanın Xan bağında yerləşən qəbirüstü abidəsini ziyarətlə başlayıb. Tədbir iştirakçıları qəbirüstü abidəyə gül dəstələri qoyaraq İsrafil Məmmədovun xatirəsini bir dəqiqəlik sükutla yad etdilər. Daha sonra tədbir İsrafil Məmmədovun ev muzeyində davam elədi. Çay süfrəsi arxasında davam edən tədbirdə İsrafil Məmmədovun qardaşı və bacısı nəvələri, Kəlbəcər rayon Sarıdaş kitabxanası, Alıkənd kənd kitabxanası, Güneypəyə kitabxanası, Şərqi Zəngəzur Mədəniyyət İdarəsinin MKS-nın Cəmillikənd kitabxanasının əməkdaşları iştirak etdilər. İ Məmmədov ev muzeyinin sabiq direktoru Eldəniz Babayev, muzeyin direktoru, Vətən müharibəsi qazisi Nəimi Mustafayev qəhrəmanın həyatından, keçdiyi döyüş yolundan danışdılar. Çıxış edənlər İsrafil Məmmədov kimi qəhrəmanların həyat və döyüş yolunun müasir gəncliyimiz üçün örnək olduğunu vurğuladılar. Sonda İsrafil Məmmədovun və Vətənimiz ərazi bütövlüyü uğrunda canlarından keçən şəhidlərimizin əziz ruhuna dualar oxundu, qazilərə uzun ömür, can sağlığı arzulandı.